Empregados de Vitrasa, a concesionaria municipal do transporte urbano de Vigo, encaráronse na tarde deste martes co alcalde, Abel Caballero, mentres o rexedor visitaba as obras do ascensor Halo.

Con berros de ‘Dimisión, dimisión’ ou ‘Menos luces, máis autobuses‘, os traballadores presentáronse pasadas as 18,30 horas nas inmediacións da rúa Serafín Avendaño. Á chegada de Caballero, comezaron a perseguilo e a encararse con el.

Así, acusárono de “enganar a 350 familias”, deixando de lado a “a clase traballadora”, asegurando que “ri dos empregados”. Tamén lle pediron que sente a falar co comité para pór fin á situación na que se atopan.

Pola súa banda, o alcalde limitouse a escoitalos e comezou a facer a ‘V’ cos dedos, un xesto típico que realiza referíndose a a inicial do nome da cidade. Finalmente, os traballadores ‘acompañaron’ a Caballero ata o seu vehículo oficial, que o recolleu na Avenida de García Barbón.

Os empregados de Vitrasa levan meses reclamando ao alcalde que medie entre eles e a empresa para pór fin á situación na que se atopan, co convenio colectivo caducado desde 2020. Os empregados levaron a cabo innumerables paros parciais e xornadas de folga para que a concesionaria municipal sente a negociar.