Inspectores do Servizo de Gardacostas de Galicia comisaron este luns case 25 toneladas (24.803 quilos) de quenlla e 49 quilos de aletas cortadas desta mesma especie de escualo nun operativo levado a cabo nun almacén frigorífico de Vigo. Segundo explican nun comunicado, o peixe proviña de Angola e foi capturado no Atlántico Sur por un buque conxelador con bandeira angolana, que se atopaba inactivo na lista do ICCAT (Comisión Internacional para a Conservación do Atún Atlántico), organización internacional da que forma parte España.

En consecuencia, o barco non estaba autorizado a pescar, reter a bordo, trasbordar ou desembarcar túnidos e especies afíns ou especies capturadas en asociación con elas, incluíndo a quenlla. O destino final desa partida serán centros benéficos da comunidade autónoma, en concreto distintos bancos de alimentos.