Unha muller resultou ferida en Vigo despois de caer unha árbore sobre o vehículo que conducía, á altura do número 108 da Avenida da Gran Vía. Segundo informa o 112, foi precisa a intervención dos Bombeiros de Vigo para evacuar á condutora, que quedou atrapada no interior do turismo.
Sucedeu sobre as 12.15 horas deste mediodía. Un particular contactaba co servizo para informar o suceso. Indicaba que unha árbore caera sobre un coche que ía circulando e que había unha muller ferida e atrapada no interior do vehículo. Con estes datos, desde o 112 Galicia pasouse aviso ao Servizo de Urxencias Sanitarias de Galicia-061, aos Bombeiros de Vigo, á Policía Local e aos efectivos da Agrupación de Voluntarios de Protección Civil da localidade. Unha vez liberada a condutora, os profesionais sanitarios confirmaron o traslado da muller ferida ao centro hospitalario de referencia.
