Unha avaría no motor que provocou un sobrequencemento nun tren que circulaba entre Guillarei e Salvaterra obrigou a desaloxar aos 76 pasaxeiros que viaxaban nel.
Segundo informou o 112 Galicia, o incidente produciuse sobre as 15.00 horas deste martes. Nese momento, o persoal de Adif comunicaba á central de emerxencias que o maquinista dun tren que se atopaba no apeadeiro de Caldelas de Tui estaba a desaloxar aos pasaxeiros tras detectar que o convoi botaba fume.
Ademais, foi o propio maquinista quen sufocou o incendio que se produciu a causa do sobrequencemento do motor, sen ser precisa a intervención dos Bombeiros e sen que ninguén resultase ferido. Ao ter coñecemento destes feitos, os xestores do 112 deron aviso aos Bombeiros de Baixo Miño, á Garda Civil, á Policía Local e a Protección Civil da localidade.
Así mesmo, a circulación entre Vigo e Ourense viuse interrompida durante algo máis dunha hora por esta incidencia e, segundo notificou Adif, estableceuse un plan de transporte alternativo por estrada para garantir a mobilidade dos viaxeiros do tren afectado.
