Un home resultou ferido este luns ao envorcar o tractor que manexaba no municipio pontevedrés do Rosal. Foron os seus familiares e os veciños que se atopaban no punto os que puideron liberalo, xa que quedara atrapado por un brazo.
O 112 Galicia tivo constancia do accidente ás 9,30 horas, cando o 061 solicitaba colaboración para unha persoa que quedara atrapada baixo un tractor envorcado cando circulaba polo lugar de San Xian.
Nada máis recibir o aviso, desde o 112 Galicia activouse un operativo formado polos Bombeiros de Baixo Miño, polos membros do GES da Guarda, dos axentes da Garda Civil de Tráfico, a Policía Local e os efectivos da Agrupación de Voluntarios de Protección Civil da localidade. A vítima foi trasladada polos servizos sanitarios ao Hospital Álvaro Cunqueiro de Vigo.