Efectivos da Garda Civil rescataron nas últimas horas a un home de 37 anos que se atopaba semiinconsciente nunha zona forestal de difícil acceso na Cañiza.

A alerta activouse na mañá deste luns, cando o cuartel da Garda Civil da Cañiza recibiu un aviso por unha persoa desaparecida. Así, iniciouse un dispositivo de procura dirixido polo capitán da compañía da Garda Civil de Tui, coa colaboración de varias patrullas e do servizo aéreo da Garda Civil procedente da Coruña.

O dispositivo deu os seus froitos pouco antes das 15,00 horas, cando o helicóptero localizou nunha montaña o vehículo do desaparecido e, a uns 100 metros, nunha zona de difícil acceso, estaba o home.

Os efectivos lograron subilo ao helicóptero e levalo a unha zona próxima, onde unha ambulancia o esperaba para atendelo e trasladalo ao hospital Álvaro Cunqueiro de Vigo.