Axentes da Garda Civil rescataron este venres o corpo dun home dunha arqueta nunha leira do concello pontevedrés da Cañiza.

Foi un irmán do falecido o que deu a voz de alarma. Segundo contou aos servizos de emerxencias, o seu irmán acudira pola mañá a limpar unha leira. Sobre as 13,30 horas, ao ver que non volvía para a casa comer, saíu a buscalo e atopouno mergullado na arqueta.

Desde o 112 Galicia informouse enseguida ao Servizo de Urxencias Sanitarias de Galicia-061, á Garda Civil, aos Bombeiros de Ponteareas e á Policía Local da Cañiza.

Unha vez no lugar dos feitos, os axentes, xunto cos particulares que se atopaban no lugar, puideron recuperar o cadáver sen ser precisa a intervención dos medios de rescate.