Un home resultou ferido de gravidade tras sufrir un corte coa motoserra que manexaba, nun local da súa propiedade en Baredo, en Baiona, o que motivou o seu traslado en helicóptero medicalizado.

Segundo informa o 112 Galicia, o accidente aconteceu arredor das 11,30 horas. Debido á gravidade das lesións que se produciron houbo que desprazar un helicóptero medicalizado. O Centro Integrado de Atención ás Emerxencias (CIAE) 112 Galicia, tamén puxo o accidente en coñecemento da Garda Civil, a Policía Local e o GES de Val Miñor. O ferido foi trasladado na aeronave até o Hospital Álvaro Cunqueiro de Vigo.