A Policía Local de Vigo detivo a un home, J.N.A, de 58 anos de idade, pola suposta comisión dun delito de violencia de xénero.

Segundo fontes policiais, os feitos tiveron lugar o pasado luns, 9 de xaneiro, cando unha patrulla da Policía Local foi requirida no Camiño Rañeira por un posible episodio de violencia de xénero.

Unha vez no lugar, os axentes entrevistáronse coa suposta vítima, unha muller de 55 anos de idade que manifestou que, despois de tomar algo coa súa parella, ambos iniciaran unha discusión, comezando este a insultala.

Xa no domicilio, ela tratou de realizar unha chamada para solicitar atención policial, momento en que o home comezou a golpeala en diversas partes do corpo, ata que finalmente a muller logrou zafarse e solicitar a presenza policial.

Tras escoitar o relato, os actuantes solicitaron a presenza dunha ambulancia medicalizada, que procedeu ao traslado da mencionada á PAC de Pizarro.

Acto seguido, os funcionarios entrevistáronse co home, de 58 anos de idade, quen asegurou que a muller “estaba teimosa e tivera que darlle unha caricia”. Por iso, a Policía Local detivo o home, pola suposta comisión dun delito de violencia de xénero.