A Fundación Provincial Banco de Alimentos de Vigo entregou máis de 835.000 quilos de comida entre as 22.000 persoas vulnerables ás que atendeu na provincia de Pontevedra durante o primeiro semestre deste ano.
Tal como informou a organización, a través das máis de 150 ONG e entidades homologadas coas que traballa entregou entre xaneiro e xuño máis de 835.000 quilos de alimentos.
“Pese ao actual contexto de crise económica, todos os nosos esforzos pretenden reverter a tendencia á baixa das doazóns e seguir mellorando a denominada cesta básica de alimentos”, subliñou a entidade.
Ademais, en xuño o Banco de Alimentos distribuíu 278.000 quilos de comida procedentes do Fondo Europeo de Axuda Europea para os Máis Desfavorecidos (FEAD), xestionado e impulsado por parte do Ministerio de Agricultura, Pesca e Alimentación.
Desde a asociación lembraron que “a fame non colle vacacións”, polo que os seus voluntarios seguirán en agosto xestionando e repartindo produtos frescos doados diariamente por parte de distintos supermercados.
Banco de Alimentos de Vigo tamén agradeceu ao Concello da cidade a subvención de 83.000 outorgada para facer fronte a unha parte dos gastos xerados polas súas instalacións do barrio de Lavadores. O ano pasado, a organización repartiu máis de 2 millóns de quilos de alimentos.
