A sección sexta da Audiencia de Pontevedra, con sede en Vigo, ditou sentenza na que estima o recurso dun pai contra unha resolución de primeira instancia, e declara extinguida a pensión que este pagaba a dúas dos seus fillos, maiores de idade, e con efecto retroactivo.

A resolución establece que, con respecto a un dos fillos, a pensión queda extinguida desde 2016, mentres que, con respecto ao outro, a retroactividade fíxase en 2021 (data de interposición da demanda).

Dáse a circunstancia de que ambos os fillos xa renunciaran previamente a esa contribución económica: unha filla asinou un escrito de renuncia en 2016, ao ter un traballo e ingresos propios, mentres que outro fillo fíxoo en 2019 por querer desvincularse do seu proxenitor e non aceptar esa pensión. En todo caso, o pai facía tempo que non pagaba esa pensión, polo que os fillos non terán que devolver o diñeiro.

A singularidade desta sentenza reside no feito de que concede o efecto retroactivo ao recorrente, xa que a xurisprudencia establece normalmente a extinción das pensións desde o momento das sentenzas. A extinción de pensións aos fillos execútase porque, se estes están a traballar ou teñen ingresos, como é o caso, poden incorrer nun enriquecemento ilícito.

PENSIÓN COMPENSATORIA Á NAI

Por outra banda, a Audiencia tamén estimou a pretensión do pai de suspender o pago da pensión compensatoria á nai dos seus fillos, ao entender acreditado que a muller mantén outra relación sentimental con convivencia.

De feito, o recorrente presentou o informe dun detective para demostrar que había convivencia marital entre ambos, aínda que a nova parella da nai asegurou que non vivía con ela, que só ía ao domicilio cando podía, e que se empadroou alí co único fin de poder visitala durante os momentos de medidas máis restritivas na pandemia de Covid.

Neste caso, o tribunal considera que a suspensión da pensión debe ter efecto retroactivo desde maio de 2020, momento en que se iniciou a convivencia coa nova parella.