O conselleiro de Sanidade, Julio García Comesaña, afirmou que “preocupa” a evolución da pandemia da covid-19 nas áreas sanitarias de Vigo e Ourense e sinalou que non se descarta adoptar medidas “se é preciso” de acordo co nivel de ocupación hospitalaria.
Preguntado este martes en Vigo pola evolución da pandemia durante este fin de semana e este luns, festivo polo Día da Constitución, explicou que carece de datos sobre o cumprimento das medidas de prevención, dos que apuntou que poden dispor as forzas e corpos de seguridade do Estado.
En todo caso, sinalou que recentemente se produciu un aumento de contaxios, mentres achacou á realización dun menor número de probas durante este fin de semana o feito de que estes últimos días non fose tan agudo.
Así as cousas, García Comesaña explicou que a análise da situación sanitaria terá en conta principalmente o nivel de ocupación hospitalaria e concretou que as áreas sanitarias que “preocupan” son as de Vigo e Ourense. Así mesmo, non descartou que poidan adoptarse medidas para conter os contaxios na reunión do subcomité clínico que terá lugar este venres “se fose preciso”.
