Vigo é a cidade que máis preocupa á Consellería de Sanidade ante o repunte de casos COVID, non só a urbe en si, senón toda a súa área de influencia, segundo a directora xeral de Saúde Pública, Carmen Durán.
A sete días, a área sanitaria con menor índice é Ferrol, con 20 casos por cada 100.000 habitantes, mentres que a de Vigo é de 79. En canto ás grandes cidades, a sete días sitúanse entre os 87 casos de Vigo e os 26 de Ferrol, mentres que a 14 están entre os 172 por 100.000 habitantes de Vigo e os 40 de Santiago.
Con estas cifras, explicou Carmen Durán, a comarca de Vigo “está a incrementar a súa incidencia acumulada nas últimas semanas”, aínda que non “de maneira importante”. Na contorna, preocupan municipios como O Porriño e Salceda de Caselas, onde se realizará “un seguimento” especial.
