Galicia lidera o sector do conxelado en España, con 143 empresas que facturan 4.236 millóns de euros anuais (42,7% do total do Estado), pero todo isto grazas a un número de traballadores que non termina de corresponderse coa devandita cifra: só 6.510 empregos que representan o 36,3% dos empregos directos do conxelado en España.

Polo tanto, a pregunta é, por que esa diferenza tan grande entre a porcentaxe de facturación, con ese 42,7% do total, e un número de empregos que só representan un 36,3%, ou sexa, un 6,5% por debaixo?

Estes datos aparecen no último estudo de Conxemar, asociación que aglutina a 220 empresas do conxelado que producen o 76% da facturación total do Estado e neste caso tamén representan exactamente o 76% do emprego directo.

Para Conxemar, no seu informe “ponse de manifesto a potencialidade dun sector (o conserveiro) que representa un dos principais soportes da economía española”. E, polo tanto, máis aínda da galega.

A súa análise inclúe os datos do último ano fiscal dispoñible (2016), e reflicte que son 603 empresas as que conforman a industria e comercialización de produtos do mar en España (sector do conxelado e conserva), e que facturaron conxuntamente 12.992 millóns de euros xerando 28.373 empregos directos. 

A pesar de ser un sector tradicional, está en alza: “O conxunto as empresas do sector xeraron en 2016 un valor engadido bruto de 1.405 millóns de euros fronte aos 1.261 millóns creados en 2015 por esas mesmas empresas”.

En conclusión, Galicia lidera con man de ferro o sector do conxelado: 143 empresas (o 38,6% do total de España), 4.236 millóns de euros de facturación (42,7% do total) e 6.510 empregos (36,3% do total).

Os niveis de facturación das demais comunidades non chegan ao 20% do total en ningún caso. O sector do conxelado de produtos do mar está a facturar no conxunto do Estado 9.918 millóns de euros anuais, e empregando de forma directa a 17.934 persoas.