Os paseos das Avenidas, Bouzas e Samil, así como o espigón da zona do Real Club Náutico, en Vigo, permanecerán pechados durante todo o fin de semana, como medida de precaución ante a previsión de mal tempo. Así o confirmaron fontes do Concello olívico e da Autoridade Portuaria, que detallaron que, para garantir a seguridade dos viandantes, non se permitirá o paso por estas zonas.

De feito, as provincias da Coruña e Pontevedra atópanse en aviso laranxa por precipitacións, unha alerta que se manterá desde a tarde do venres ata o sábado e que se suma ao aviso do mesma cor que afecta a todo o litoral galego.

A Dirección Xeral de Emerxencias e Interior da Vicepresidencia da Xunta decidiu activar este aviso ante a previsión de precipitacións acumuladas en 12 horas de 80 mm no suroeste da provincia da Coruña, nas Rías Baixas e no interior de Pontevedra.

Este aviso por choivas únese á alerta laranxa, decretada no mediodía deste venres, por ventos de ata 100 quilómetros por hora en todo o litoral galego, onde tamén se espera mar combinado que pode alcanzar os 7 metros na costa da Coruña.