O programa de detección de casos de COVID-19 en persoas asintomáticas deu comezo este martes en 381 farmacias da provincia de Pontevedra, que representan o 89% do total.
Tras o programa piloto desenvolvido en seis farmacias das áreas sanitarias de Pontevedra e O Salnés e Vigo no que participaron 560 persoas de entre 40 e 64 anos, iniciouse este cribado poboacional gratuíto, segundo detallou o Colexio de Farmacéuticos de Pontevedra.
O obxectivo deste programa pasa por identificar casos de COVID-19 que non presenten sintomatoloxía a través da análise dunha mostra de saliva coa aplicación da técnica ‘pooling’ no Laboratorio de Microbioloxía da área sanitaria de Vigo. Tras o estudo, notificarase o resultado aos participantes e, se é positivo, realizaráselles unha proba PCR con mostra nasofarínxea.
A iniciativa foi posta en marcha en virtude do protocolo asinado polo conselleiro de Sanidade, Xullo García Comesaña, e a presidenta do Colexio de Farmacéuticos de Pontevedra, Alba Soutelo, e está destinada a persoas de entre 40 e 64 anos que non presenten sintomatoloxía compatible coa COVID-19.
Os farmacéuticos poderán ofrecer a realización da proba a persoas que dispoñan dun cartón sanitario do Sergas, un teléfono móbil no que recibir o resultado e non se someteron a unha PCR nos últimos 15 días. Se estas aceptan, entregaranlles o tubo no que deberán recoller 1 mililitro de saliva ao levantarse en xaxún e que entregarán de novo na farmacia para a súa posterior remisión ao laboratorio.
En cambio, non se contempla a participación de persoas que fosen positivas por coronavirus no últimos tres meses ou contactos de contaxiados en seguimento, que traballen ou vivan nunha residencia de persoas maiores ou con discapacidade ou que sexan pacientes paliativos ou inmobilizados.
LIMITACIÓN DE PROBAS
A inclusión neste cribado limitarase de acordo co número de probas que pode analizar o laboratorio. Así, cada farmacia disporá de 80 tubos de recollida de mostra de saliva para a primeira semana e poderá entregar un máximo de 10 ou 20 segundo o día. A listaxe dos centros participantes pode consultarse na páxina web do Colexio de Farmacéuticos de Pontevedra.
A presidenta do colexio valorou o interese que xerou este cribado na cidadanía, á que chamou a “acudir gradualmente ás farmacias”. “Está previsto que dure polo menos dous meses, polo que todas as persoas que cumpran os requisitos poderán participar no programa”, asegurou.
