Galicia volve este venres a estar en cifras de marca en case todos os parámetros da pandemia, que marca o seu teito en contaxios detectados (1.802), positivos por PCR (1.505), número de casos activos (17.125) e taxa de positividade (13,3%), isto último se se descontan as cifras alcanzadas durante as primeiras semanas das crises sanitarias, nas que o volume de probas practicadas era moito menor.

Así se desprende da actualización da evolución da pandemia recollida na web de Sanidade ata as 18,00 horas do xoves 21 de xaneiro, momento no que os hospitais galegos acollían a 50 pacientes máis que 24 horas, o que pon a Galicia en camiño de, se continúa a tendencia dos últimos días, alcanzar o milleiro de ingresados con covid-19.

E é que no últimos tres días as autoridades sanitarias informaron de 50 novos ingresos diarios. Segundo o último balance, son xa 932 as persoas hospitalizadas nas sete áreas sanitarias galegas, que suman 137 pacientes en UCI, dúas máis que na xornada previa.

Así, os hospitais galegos dobraron o número de pacientes con coronavirus en só 10 días. O 12 de xaneiro había 441 ingresados polos 932 do último balance, case un 90% máis, porcentaxe similar ao aumento rexistrado na UCI, que fai dez días albergaban a 71 pacientes polos 132 de agora.

Na análise por áreas, o distrito máis afectado, A Coruña-Cee, é tamén o que máis empeora respecto ao día anterior ao sumar outros 22 ingresos que deixan o total en 248 pacientes covid hospitalizados, 38 deles en UCI (sen cambios).

Tras A Coruña atópase a área de Vigo que, no entanto, presenta unha diminución no número de persoas ingresadas con coronavirus, o único distrito no que baixan xunto con Lugo. Na primeira descenden a 137 (-2), con 21 deles en UCI (-1); mentres que no distrito lucense a baixada é tamén de 2 hospitalizados menos ata os 46, aínda que soben a 10 os que requiren coidados intensivos (+1).

En Santiago-Barbanza aumentan a presión hospitalaria ata os 142 ingresados (+6), 28 deles en críticos (sen cambios); mentres que en Ferrol o incremento é de dous díxitos, que deixa o total en 133 (+15), 16 en UCI (+2); o que converte a este distrito no cuarto con máis persoas ingresadas.

Ferrol supera así a Ourense que, no entanto, tamén suma máis ingresados que o día anterior ata os 129 (+5), dos cales hai 10 en coidados intensivo (sen cambios). Por último, Pontevedra queda ao bordo do centenar de pacientes con 98 (+9), 14 en críticos (sen cambios).

MARCA DE CONTAXIOS

As cifras deste venres son as peores da pandemia ata a data en canto á detección de contaxios, o que fai que Galicia eleve aínda máis o teito de persoas con enfermidade activa, unha marca que se bate diariamente desde hai unha semana.

Os 1.802 contaxios detectados polas autoridades sanitarias (a través de calquera proba diagnóstica, non só PCR) son o máximo da pandemia. Tamén hai nova marca nos positivos por proba PCR, con 1.505, a pesar de que se practicaron 500 test menos que o día anterior, xornada na que se alcanzou o teito da crise sanitaria.

En total foron realizadas 12.179 probas PCR ao longo da xornada (van 1.297.047 desde o inicio) que arroxaron unha taxa de positividade do 13,3%, marca da pandemia se se descontan as primeiras semanas da crise nas que o número de test dispoñibles era máis limitado que na actualidade.

Con estas cifras Galicia case tripilica o 5% que marca a OMS para dar por controlada a pandemia, un baremo do que non se baixa na Comunidade galega desde o 24 de decembro. E é que só Lugo ten unha taxa de positividad menor do 10% nas últimas horas (9,3%), nas que Ourense chegou ao 21,7% e Ferrol ao 18%.

NOVOS CONTAXIOS

En canto ao número de contaxios detectados por área –todas suman máis dun centenar de casos–, A Coruña é de novo a que máis achega con outra xornada de case medio milleiro de diagnósticos covid-19 cun total de 446 (+4). Vigo, con 354 (+31), tamén superou de novo os 300 contaxios, limiar que se rozou en Santiago cos 295 diagnósticos (+62).

E é que só Pontevedra e Ferrol detectaron menos contaXios que o día anterior con 162 (-52) e 129 (-12), respectivamente. En Ourense foron 253 (+11) e en Lugo 163 (+31).

CASOS ACTIVOS

Do mesmo xeito que este venres supón unha marca no número de contagios tamén hai nova marca de total de casos activos con 17.125, 1.095 máis que 24 horas antes, co que se mantén a tendencia das últimas dúas semanas, nas que as persoas con infección activa crecen exponencialmente cada día.

Así, A Coruña suma xa 4.414 casos activos na súa área sanitaria (+290) e Vigo pasa o limiar dos 3.000 tras sumar 211 que deixan o cómputo global en 3.153. Santiago encamíñase tamén a superar esa liña con 2.843 (+149).

Tras elas atópase a área de Ourense, que acumula 2.413 casos (+18). Por baixo dos 2.000 están o resto de distritos sanitarios encabezados por Pontevedra –1.485 (+111)– seguida de Lugo –1.449 (+88)– e, por último, Ferrol –1.386 (+84)–.