O centro Casa Nuestra Señora de Fátima y Cristo Rey de Crecente, no que se administrou a primeira dose da vacina contra a COVID-19 desenvolvida por Pfizer o pasado 5 de xaneiro, rexistrou un gromo que afecta a 28 das súas usuarias.
No boletín deste martes a Consellería de Política Social notificou sete casos entre as usuarias. Con todo, fontes da dirección deste centro para persoas discapacitadas explicaron que o Sergas lles comunicou que a cifra ascendeu a 28 tras coñecerse os resultados das PCR realizadas á totalidade das residentes, que suman 68.
As mesmas fontes vincularon este gromo ao incremento de casos de coronavirus rexistrado nesta localidade tras o período do Nadal, cando apuntou que se produciron desprazamentos procedentes das cidades, que presentan unha maior incidencia acumulada que as zonas rurais. Como consecuencia, procedeuse a illar aos casos positivos e os seus contactos.
Ademais, resaltaron que na residencia se traballa con grupos sectorizados desde marzo co obxectivo de evitar a propagación do virus. No entanto, incidiron en que a discapacidade que presentan as usuarias leva dificultades para garantir o cumprimento das medidas de seguridade.
Así mesmo, explicouse que este luns se contabilizaban dous traballadores contaxiados, pero que os resultados do test de saliva realizado semanalmente mediante o método ‘pooling’ permitiron detectar outros catro casos.
