A alcaldesa do Porriño, en corentena tras un positivo entre o seu persoal de confianza

Manterá parte da súa axenda a través do teletraballo

A alcaldesa do Porriño, Eva García de la Torre, é atendida nunha ambulancia / Concello do Porriño

A alcaldesa do Porriño, a socialista Eva García de la Torre, atópase illada en corentena, despois de detectarse un caso positivo en COVID-19 entre o seu persoal de confianza, segundo confirmaron fontes do goberno municipal.

As mesmas fontes detallaron que ese caso positivo correspóndese cunha persoa de confianza da rexedora que, aínda que está asintomática, obrigou tanto á alcaldesa como a outros membros do seu equipo a illarse e gardar unha corentena de 10 días, tal e como establece o protocolo sanitario.

A ese respecto, García de la Torre cancelou a súa axenda para este luns e as reunións que tiña previstas, unha delas con Andrés Fernández, conselleiro delegado do Grupo Zendal (cuxa planta do Porriño está a fabricar vacúas contra o coronavirus), co que ía abordar a expansión da firma no municipio.

Ademais deste encontro, a rexedora anunciou tamén o adiamento da reunión prevista con Indalecio Cuevas, presidente da entidade urbanística de conservación do polígono industrial da Granxa. No entanto, precisaron fontes municipais, Eva García manterá parte da súa actividade a través do teletraballo.