Os contaxios diarios detectados por PCR en Galicia dispáranse ata os 590, case 300 máis que 24 horas antes, e case tres veces máis dos que había durante a fin de semana. Deste xeito crecen os casos activos ata os 6.404 –407 máis que na xornada anterior–.

En concreto, segundo os datos publicados este mércores na web da Consellería de Sanidade, con cifras ata as 18,00 horas do martes, en Galicia rexistráronse en 24 horas 590 casos por PCR nunha xornada na que se practicaron 7.752 probas deste tipo (3.543 máis que o día antes). Con estas cifras, a taxa de positividade sitúase en torno ao 7,6%.

No entanto, a presión hospitalaria de pacientes covid mantense en datos similares aos dun día antes, con 399 ingresados (un máis). Deles, 57 persoas permanecen na UCI (tamén unha máis) Na área de Vigo hai 90 novos contaxios detectados por PCR, 61 máis que un día antes, e os enfermos sitúanse en 1.146.

HOSPITALIZACIÓN

Pese ao aumento dos contaxios confirmados, a presión hospitalaria mantense nas mesmas cifras que o luns –cun paciente máis–. Así, hai 399 persoas ingresadas, das que 57 están en unidades de coidados intensivos (UCI). Na área de Vigo, pola súa banda, hai 54 pacientes en hospital (sete menos) e 13 en UCI (+1).