Sanidade confirmou este venres que o cribado masivo realizado na localidade pontevedresa de Moaña desvelou cinco casos positivos de COVID-19, entre as case 9.000 persoas que foron sometidas a probas.

Así, o Sergas citara finalmente a 12.109, que eran as que cumprían os requisitos esixidos –ser maior de 15 anos, ter cartón sanitario e estar dado de alta no sistema ‘Lembra’–, a pesar de que a previsión inicial era convocar a case 20.000 persoas.

Dos pacientes citados, acudiron a realizarse o test 8.902 (un 73,5 %). A maior parte deles foron sometidos a probas PCR a través de saliva (7.815), mentres que o resto (1.087) fixéronse probas con extracción de mostra nasofarínxea. Do total, detectáronse cinco casos positivos.

Nos últimos días, o Sergas tamén trasladou outros resultados de cribados. Segundo informou, nas probas realizadas en Tui, Redondela e o CIFP Manuel Antonio de Vigo, detectáronse un total de 23 casos de COVID (4 en Tui, 6 en Redondela e 13 no centro educativo).

Ademais destas análises, que se realizan para localizar a persoas infectadas que non teñan síntomas, tamén se está cribando á poboación asignada a varios centros de saúde de Vigo, así como pacientes de Chapela-Redondela, Gondomar e Cangas.