Trinta mulleres científicas e tecnólogas darán a coñecer entre o alumnado infantil a través de seis sesións de traballo en horario lectivo aspectos como os estereotipos de xénero vinculados a estas disciplinas, as súas saídas profesionais ou o papel das mulleres ao longo da historia da ciencia.
Farano co obxectivo de promover estas vocacións, as científicas e tecnolóxicas, entre nenas de centros da provincia de Pontevedra.
A Deputación de Pontevedra trasladou o seu apoio a este programa, que se denomina ‘InspiraSTEAM’ e é iniciativa da Universidade de Vigo.
A presidenta da institución provincial, Carmela Silva, participou este mércores nun encontro telemático co reitor Manuel Reigosa e a vicerreitora de Captación de Alumnado, Estudantes e Extensión Universitaria, Natalia Caparrini, tras o que presentaron este acordo.
Segundo os datos achegados pola institución académica, mentres o 54,8% do total do alumnado do sistema universitario español son mulleres, a súa presenza nas titulacións técnicas como enxeñarías e arquitectura é só do 25%, unha cifra que nalgunhas titulacións redúcese ao 8%.
Por iso, a Deputación e a Universidade de Vigo coinciden en sinalar que estes datos evidencian a necesidade de adoptar medidas que fomenten a presenza de mulleres nas disciplinas coñecidas como ‘STEAM’, un acrónimo en inglés que xorde das palabras Ciencia, Tecnoloxía, Enxeñaría, Arte e Matemáticas.
Nesta liña, a Universidade de Vigo puxo en marcha en 2018 o programa ‘InspiraSTEAM’, do que este mércores se presentou a terceira edición, á que se suma a Deputación de Pontevedra.
REFERENTES FEMININOS
Trátase dun proxecto no que mulleres profesionais nestes campos tutorizan grupos infantís, especialmente de nenas, de centros escolares da provincia de Pontevedra, para que poidan contar con referentes femininos en ciencia e tecnoloxía e valoren estas profesións para o seu futuro.
Carmela Silva aplaudiu esta iniciativa da Universidade de Vigo que a converte en “unha referencia para todas as universidades do Estado no que ten que ver coas políticas de igualdade” e alertou do que supón que as mulleres estean “infrarrepresentadas” naquelas carreiras que “van xerar a actividade do futuro, as que van crear empregos de mellor calidade e maior salario”.
O reitor, Manuel Reigosa, advertía que “sería unha mágoa que se estivese perdendo potencia”, en referencia á captación do talento feminino nestes campos do coñecemento.
Pola súa banda, Natalia Caparrini explicou que a base do proxecto son as mentoras. Nesta edición serán 30 mulleres as que de maneira voluntaria decidiron implicarse neste programa.
CICLO E LONAS POLO 25N
Por outra banda, a Deputación e a Real Academia Galega de Ciencias (RAGC) celebran este xoves ás 19,00 horas unha nova sesión do ciclo de conferencias Aida Fernández de los Ríos.
Nesta ocasión será co seminario virtual ‘A tecnoloxía dás cadeas de bloques: alén do bitcoin e contra ou coronavirus’, impartido polo profesor Martín López Nores, doutor do departamento de Enxeñaría Telemática da Universidade de Vigo.
Este xoves tamén arrinca unha programación que a Deputación desenvolverá ao amparo do 25N, Día Internacional da Eliminación da Violencia contra a Muller. Comezará coa colocación de senllas lonas nas fachadas do Pazo Provincial e da sede de Vigo.
