O Diario Oficial de Galicia publica este venres o nomeamento da doutora Susana Cerqueiro como nova directora de Procesos Asistenciais da área sanitaria de Vigo, en substitución de Alfredo Silva.
Cerqueiro, que ata agora ocupaba a Dirección de Atención Hospitalaria, é Licenciada en Medicina pola Universidade de Santiago de Compostela, e cursou másteres relacionados coa Dirección e Xestión de Servizos Sanitarios e Urxencias.
Facultativa de Admisión e Documentación Clínica, exerceu distintos cargos como médico avaliador do Instituto Nacional da Seguridade Social, inspectora do Corpo Facultativo Superior da Xunta de Galicia, e outras responsabilidades directivas en institucións dependentes do Sergas e da Consellería de Sanidade.
Cerqueiro foi subdirectora operativa no Complexo Hospitalario Universitario de Santiago durante 8 anos; directora médica no Hospital do Salnés; subdirectora xeral na Dirección Xeral de Asistencia Sanitaria; e directora de Procesos con Ingreso na área de Santiago.
Hai dous anos incorporouse ao equipo directivo da área sanitaria de Vigo como directora de Procesos de Soporte e, posteriormente, fíxose cargo da Dirección de Atención Hospitalaria, ata hoxe.
