Galicia rexistrou outros 639 casos diarios de COVID-19, unha cifra inferior aos contaxios detectados nas últimas dúas xornadas. De feito, a incidencia baixou en todas as áreas sanitarias agás na de Vigo, na que os positivos en 24 horas repuntaron a 165 –11 máis–, e na de Santiago-Barbanza, onde subiron a 71 –10 máis–.
Así se reflicte nos datos actualizados na mañá deste sábado na web da Consellería de Sanidade con cifras actualizadas ata as 18,00 horas do venres, dos que se desprende que a área sanitaria da Coruña e Cee contabilizou 135 novos casos de coronavirus, 18 menos que un día atrás.
Tamén diminuíu a incidencia da pandemia en Lugo-A Mariña-Monforte, con 99 positivos novos (-8); en Pontevedra-O Salnés, con 75 (-17); en Ourense-Verín-O Barco, con 54 (-6); e en Ferrol, con 40 novos positivos (-18).
Ata a data realizáronse en Galicia un total de 738.753 PCR, o que reflicte que en 24 horas fixéronse 7.976 probas, lixeiramente por enriba da cifra do día anterior. De todas elas, o 8,9% arroxou un resultado positivo, aínda por encima do 5% que marca a Organización Mundial da Saúde.
Todas as áreas sanitarias superan este limiar, lideradas por Lugo e Santiago, co 11% de positividade. Seguen a estas A Coruña (9,3%), Vigo (8,9%), Ferrol (8,1%), Pontevedra (7,4%) e Ourense (6,6%).
ALTAS E CASOS ACTIVOS
Os datos de Sanidade reflicten que nas últimas 24 horas curáronse do coronavirus 579 persoas, ata situar o total desde o inicio da pandemia en 29.955. Ademais, as cifras deste sábado sumaron sete novas vítimas mortais notificadas na tarde do venres –dúas relacionadas con residencias de anciáns– e o total de falecidos que deixa a pandemia colócase en 976.
En canto aos casos activos –é dicir, persoas que aínda padecen a enfermidade–, volveron a aumentar a 10.276, o que supón que este sábado hai 80 pacientes máis de COVID-19.
Así, ascenderon na área sanitaria de Vigo, que marca máximo da pandemia con 2.530 casos activos (+55 con respecto a un día atrás); na da Coruña, con 1.886 (+55); na de Pontevedra, con 1.229 (+35); e na de Lugo, con 1.157 (+48).
Pola contra, baixaron os pacientes de coronavirus na área de Santiago, a 1.289 (-49); na de Ourense, a 1.096 (-35); e na de Ferrol, a 1.089 (-29).
