O Xulgado do Contencioso-Administrativo 1 de Vigo anulou unha sanción de 601 euros imposta a unha muller que paseou pola cidade durante a vixencia do estado de alarma.

Segundo recolle a sentenza, deixouse a multa sen efecto ao entender que resulta “contraria a dereito” e condenouse á Administración demandada, a Subdelegación do Goberno en Pontevedra, a devolver o importe abonado por esta muller, 300,50 euros, que se acolleu ao desconto por pronto pago.

O xuíz lembrou que os feitos tiveron lugar o pasado 22 de marzo sobre as 15,00 horas, cando esta muller foi sorprendida nun parque de Vigo, polo que foi sancionada ao entender que cometera unha infracción de desobediencia.

Con todo, recalcou que “ningún axente nin autoridade” dirixiu unha orde que esta muller “se negase a acatar” e remarcou que resulta preciso un “requirimento expreso” que “resulte desatendido”, para “apreciar a concorrencia da infracción de desobediencia”.

Nesta liña, o titular do xulgado do Contencioso-Administrativo número 1 de Vigo insistiu en que non se pode imputar unha infracción administrativa grave de desobediencia á autoridade ou aos seus axentes “polo xenérico incumprimento do ordenamento xurídico” a unha persoa se non se lle realiza “un requirimento expreso previo, persoal e directo”.

Deste xeito, o maxistrado concluíu que o incumprimento das restricións impostas durante o estado de alarma “non pode ser cualificado automaticamente como infracción de desobediencia”. Así, afirmou esta só concorrerá cando, “incumprindo o particular as limitacións do estado de alarma, sexa requirido para o seu cumprimento por un axente da autoridade e desatenda dito requirimento”.

Esta foi a segunda vez que este xulgado se pronunciou deste xeito, xa que hai uns días anulou unha multa imposta a un home sorprendido mentres paseaba por Vigo durante o período no que o Real Decreto estaba en vigor ao entender que non cometera unha infracción de desobediencia.