UGT e CC.OO. pediron que leve a cabo unha investigación sobre a xestión da pandemia que “sinale os erros cometidos” e “estableza responsabilidades”.

Durante unha rolda de prensa celebrada en Vigo con motivo do Día Internacional das Persoas Maiores, representantes sindicais remarcaron as consecuencias derivadas da pandemia da COVID-19 e apuntaron que levou o falecemento de máis de 20.000 persoas deste colectivo.

Neste sentido, os sindicatos lembraron a estas vítimas e afirmaron que o seu falecemento mostrou a “incapacidade” do sistema para “dar unha resposta adecuada” a esta situación. Ademais, aseguraron que a crise sanitaria “puxo de manifesto as graves deficiencias do Servizo para a Autonomía Persoal e a Atención á Dependencia (SAAD)”.

Por este motivo, UGT e CC.OO, demandaron que se constitúa unha comisión no Parlamento de Galicia que investigue o ocorrido e permita depurar “responsabilidades”.

Así mesmo, demandaron o desenvolvemento e a implantación de políticas que garantan unha atención sociosanitaria “adecuada” e o envellecemento activo como “base do benestar” das persoas maiores.

GASTO EN SANIDADE

Do mesmo xeito, os sindicatos pediron que o gasto sanitario público pase de representar o 6,2% do PIB a alcanzar o 7,2% e que o importe destinado á Atención Primaria represente o 25% do total. Precisamente, as centrais apuntaron que en Alemaña se destina o 9,7% do PIB á sanidade, mentres que en Francia e Reino Unido este gasto representa o 9,4% e o 7,8%, respectivamente.

Tamén reclamaron que se garanta a protección das persoas maiores autónomas ou que precisen de axuda ante a situación actual. Ademais, avogaron por que o Executivo central e os gobernos autonómicos establezan condicións que permitan alcanzar un marco de colaboración social que achegue seguridade xurídica, eficacia e calidade á atención ás persoas maiores.

Adicionalmente, as centrais sinalaron a necesidade dunha coordinación da atención sociosanitaria que se articule mediante unidades monitoradas polo sistema público de saúde. Tamén apostaron por abrir un debate para desenvolver unha Lei integral de dereitos de persoas maiores que garanta a súa protección social e económica.

CC.OO. e UGT esixiron ademais unha revalorización automática das pensións de acordo co Índice de Prezos ao Consumidor (IPC) e a “revitalización” do Pacto de Toledo como “instrumento de diálogo social”.