A conselleira de Política Social, Fabiola García, informou este martes de que a Xunta ten en licitación a construción da nova escola infantil da Guarda (Pontevedra), un centro que contará con 41 prazas.

Así o afirmou durante unha visita realizada ao lugar no que se emprazará o futuro centro de infantil, en compañía do alcalde deste municipio, Antonio Lomba.

A conselleira de Política Social explicou que, a partir deste martes, xa se poden presentar as propostas para a construción das novas instalacións, que se localizarán no antigo colexio Manuel Rodríguez Sinde.

A nova escola da Guarda, que se integrará na rede pública autonómica, terá tres unidades e 41 prazas, o que permitirá aumentar o cociente de atención infantil ata o 48%, 15 puntos superior ao recomendado pola Unión Europea. A súa construción e equipamento contan cun orzamento de 760.000 euros, dos que o Goberno galego achega 480.000 euros e a Administración local os 280.000 euros restantes.

En concreto, as obras consistirán na reforma da antiga vivenda dos mestres e do vello comedor, sobre os que se levantará unha nova planta. Deste xeito, o edificio contará cunha superficie de 680 metros cadrados que se distribuirá en tres aulas, un espazo de usos múltiples, aseos, unha cociña e estancias de uso exclusivo do persoal.