A Consellería de Sanidade decidiu a prohibición de visitas nunha residencia de maiores da Guarda e a paralización de actividade nos dous centros de día desa localidade, ante a situación epidemiolóxica deste municipio.

Así o trasladaron fontes sanitarias, que sinalaron que estas medidas son preventivas e non se deben a que A Guarda teña un número de casos de COVID especialmente elevado, senón ao “tipo de transmisión”.

As mesmas fontes explicaron que os casos na Guarda son “moi dispersos” e, para evitar que se produza unha maior transmisión e que esta afecte á poboación máis vulnerable, optouse por non permitir visitas na residenca Monte Tecla, así como o peche dos centros de día.

Así mesmo, Sanidade avanzou que esta semana se fará un cribado con probas PCR para detectar posibles contaxios a todos os residentes, usuarios e traballadores deses centros.