Ao redor dunha trintena de axentes de Policía Nacional da Comisaría de Vigo atópanse illados á espera de coñecer se resultaron afectados por un brote de coronavirus, do que se confirmaron xa 7 casos positivos.
Segundo confirmou o sindicato SUP, hai cinco axentes pertencentes á Unidade de Intervención, que estiveran traballando no aeroporto de Barajas, e que deron positivo en COVID-19, aos que se suman outros dous funcionarios das oficinas (positivos confirmados hai unha semana).
Ademais, outros 30 policías do grupo VIII da UIP de Vigo están illados á espera de saber se se contaxiaron, polo que o sindicato policial reclamou que se fagan probas PCR a todos os axentes da UIP “en cada saída e regreso” á Comisaría.
Na área sanitaria de Vigo, segundo datos de Sanidade, hai actualmente 185 casos activos de coronavirus, dos que 4 son pacientes hospitalizados (un no Álvaro Cunqueiro e 3 no Hospital Povisa); o resto de pacientes recupéranse nos seus domicilios.
