O Exército de Terra, a través do seu Mando Compoñente Terrestre, no ámbito da ‘Operación Balmis’ con motivo da crise sanitaria pola COVID-19, desprega este venres unidades da Brilat que, entre outras, levarán a cabo tarefas de desinfección en tres hospitais de Vigo.
Segundo informou a Brilat, en concreto os equipos de descontaminación NBQ (Nuclear, Bacteriolóxico, Químico) van realizar labores de desinfección no Hospital Meixoeiro, no Nicolas Peña e no Hospital Álvaro Cunqueiro en Vigo.
Tamén teñen previstas este venres labores de desinfección na Fundación da Santa Cruz en Vigo, así como no Padroado San José en Langreo, no Hospital IMOMA en Oviedo e nos exteriores e accesos Sanatorio Covadonga en Xixón, este tres últimas actuacións en Asturias.
Ademais, este venres a Brilat ten entre as súas cometidos misións de presenza e recoñecemento nos municipios pontevedreses de Vilagarcía, Cangas, Silleda, Meis e Vilanova de Arousa; así como nas localidades asturianas de Siero, Xixón e Salas; e nas castelás de Gardo e Monzón de Campo.
A elas súmanse misións de apoio co despregamento da estación de triaxe no Hospital Universitario Central de Asturias en Oviedo (HUCA) e de colaboración coa Garda Civil no control fronteirizo no límite de Galicia con Portugal nas provincias de Pontevedra e Ourense, con patrullas móbiles.
Estas actuacións, lembra a Brilat, “poderán verse modificadas en tempo e lugar” por, puntualiza, “motivos operativos ou a recepción de novas instrucións”.