Os sindicatos CIG e Alternativas na Xustiza-CUT reclamaron que se manteña o peche do xulgado do Social 3 de Vigo, que permanece clausurado desde hai uns días para ser sometido a unha desinfección, despois de que a filla dun traballador dese positivo na proba do Covid-19.
Desde a CIG pediuse que se aplique “o principio de cautela” e se manteña o peche desas instalacións “ante o risco de que se produza un contaxio” de coronavirus, e lamentaron que a administración teña “intención” de renovar a actividade no xulgado o vindeiro luns.
O sindicato nacionalista apuntou que este xulgado non é “esencial” porque “hai outros cinco xulgados do Social funcionando” en Vigo, e lembrou que “o normal é que se manteña ao persoal nas súas casas por se aparcen síntomas da enfermidade”.
Na mesma liña, Alternativas na Xustiza-CUT mantén que só deberían estar abertos os xulgados de garda e, con respecto á sala do Social 3, coincidiron en reclamar que permaneza clausurada “mentres non fagan as probas a todos os traballadores ou pasen a corentena”.
Pola súa banda, o Tribunal Superior de Xustiza de Galicia (TSXG) trasladou este xoves que, segundo acordo da Comisión de Seguimento da crise sanitaria Covid-19, o peche de órganos xudiciais só realizarase cando así o dedica a autoridade sanitaria competente, que no estado de alarma corresponde á Delegación do Goberno.
