O alcalde de Vigo, Abel Caballero, confirmou este martes que non levará a modificación do plan parcial de Navia ao pleno da corporación ata que a Xunta non se comprometa “por escrito” coa construción dun Instituto de Ensino Secundario nese barrio.
Así o trasladou nunha rolda de prensa, en resposta ás preguntas expostas polo grupo municipal do PP na Xerencia de Urbanismo. Reiterou que a subscrición dun protocolo para acometer esa construción é “imprescindible” para que o goberno local leve a pleno a modificación do plan parcial.
Esa modificación xa recibiu luz verde dos servizos urbanísticos de Vigo, pero non se pode tramitar se non pasa antes por sesión plenaria. Así, a urbanización de novas zonas do barrio de Navia e a construción de 1.600 vivendas protexidas que impulsa a Xunta queda pendente dese paso, que Abel Caballero condicionou a que haxa un compromiso coa construción do IES.
O alcalde lembrou que o Concello acometeu numerosas melloras e dotación de servizos nese polígono para que os seus máis de 9.000 veciños teñan “mellor calidade de vida”, con parques infantís, sala de lectura, instalacións deportivas ou lugares “de esparexemento”. “E a Xunta non quere facer un instituto”, incidiu, e reiterou que ese centro educativo ten que ser “a primeira” dotación nova que se execute en Navia.
