Os traballadores das residencias para persoas maiores do Grupo DomusVi volveron concentrarse, por noveno mes consecutivo, ante a sede da firma líder dos servizos xeriátricos en España, para denunciar a “sistemática vulneración dos dereitos laborais dos traballadores”. A concentración foi convocada polo colectivo Trega ( Traballadores de Residencias de Galicia), e conta co apoio das dúas asociacións de familiares de usuarios de residencias máis activas de Galicia: ASFAREBA (Vigo) e Vellez Digna (O Morrazo).
“O grupo empresarial DomusVi incumpre e vulnera de forma sistemática o convenio colectivo en vigor do sector de residencias privadas da terceira idade de Galicia”, aseguran os protestantes, que din que a empesa “se aproveita dunha forma mesquiña das precarias condicións que rodean nestes últimos anos as economías española e galega, en xeral, e ás traballadoras e traballadores das residencias de maiores, en particular”.
DomusVi é líder do sector de servizos xeriátricos en España e en Galicia, e é propiedade de fondos capitalistas de Inglaterra e Francia. En Galicia posúe ou xestiona 30 residencias para persoas maiores, 13 na provincia da Coruña, 6 en Pontevedra e en Ourense, e 5 en Lugo. A capacidade de cada unha destas residencias rolda as 150 prazas, e cada un dos usuarios paga polos servizos asistenciais e residenciais uns 2.000 euros mensuais. Na provincia de Pontevedra, as residencias de DomusVi sitúanse en Vigo (3), Ribadumia, Lalín e Aldán-Cangas. As tres residencias de Vigo están situadas en Bembrive, Barreiro e Montecelo-Teis.
O persoal (mulleres na súa maioría) “soporta un trato case esclavista imposto pola empresa” que se traduce no “abusivo incumprimento da xornada anual, excedéndose con fartura o cómputo máximo de 1.776 horas traballadas que regula o convenio colectivo en vigor”, denuncian.
Tamén din que se incumpren os contratos e as funcións das categorías profesionais; que non se compensan os festivos traballados e que se impoñen quendas de traballo “devastadoras” de ata 10 xornadas de traballo consecutivas, sen descanso, cando o convenio marca claramente que “os traballadores terán dereito a un descanso mínimo semanal dun día e medio (36 horas) sen interrupción”.
Estas “condicións de abuso”, engaden, “tamén conlevan unha presión daniña sobre a saúde física e psíquica das traballadoras, o que fragua un índice de baixas, temporais e de longa duración, altísimo”.
Para os protestantes, DomusVi é “o paradigma do boiante e expansivo negocio do sector residencial e asistencial para persoas maiores en mans de poderosas multinacionais ou grupos de ‘capital investimento’, e nunha sociedade envellecida como a galega (ou a española)”.
Pero, agregan, “mentres os beneficios empresariais crecen, os usuarios e usuarias, a maior parte deles anciáns con enfermidades ou trastornos físicos e/ou psíquicos graves, “enfróntanse a unha deterioración paulatina do servizo asistencial que reciben, resultado dos recortes no número de persoal que vén producindo no sector e das precarias condicións laborais que redundan nunha atención deficiente ás persoas maiores”.
