A Consellería de Sanidade enviará “nos próximos días” ao Concello de Moaña (Pontevedra) a redacción do novo convenio para a construción do novo centro de saúde do municipio que, espera, “permitirá conformar un acordo en breve”.

Segundo informa a Xunta, o conselleiro de Sanidade, Jesús Vázquez Almuiña, e a alcaldesa de Moaña, Leticia Santos, entrevistáronse este luns no edificio administrativo do Servizo Galego de Saúde (Sergas), en Santiago.

Esta reunión, explica a Consellería, tiña o obxectivo “de seguir avanzando no estudo das necesidades” e desenvolveuse “nun clima de colaboración e cordialidade” por parte de ambos os representantes.

Este novo centro de saúde está enmarcado no plan de necesidades de Atención Primaria de Cangas-Moaña, dotado con 11,2 millóns de euros e cunha “visión supramunicipal”, xa que permitirá que os dous concellos conten “con maiores coberturas e servizos”.