O Consello de Goberno da Universidade de Vigo (UVigo) aprobou unha Oferta de Emprego Público (OEP) para 2019 que suma 55 prazas para Persoal de Administración e Servizos (PAS) funcionario e 25 para o laboral.

Segundo trasladou a universidade, deste xeito, a taxa de temporalidade na institución educativa reducirase ata situarse por baixo do 8 por cento.

En concreto, un total de 36 das prazas para funcionarios corresponden á taxa adicional para a estabilización do emprego e, outras 13, á promoción interna independente. Mentres, establecéronse cinco postos de traballo para a taxa de reposición e un para persoal indefinido non fixo.

En canto ás prazas fixadas para PAS laboral, unha reservouse para persoal indefinido non fixo, tres, para promoción interna independente; e os 21 restantes corresponden á taxa adicional para a estabilización do emprego.

Adicionalmente, o Consello de Goberno aprobou a convocatoria do programa de captación de talento investigador 2019, que ofrece un contrato de tres anos a xornada completa que se poderá prorrograr outros dous. Ademais, na modalidade de investigador distinguido incluirase a posibilidade de prórrogas adicionais de cinco anos.