A catedrática da área de Dereito Procesual Esther Pillado converteuse este martes na primeira muller en asumir o cargo de valedora universitaria da Universidade de Vigo, despois de que fose elixida polo claustro da UVigo con 63 votos a favor e un en branco para suceder a Argimiro Rojo, que abandonou o posto por xubilación o pasado verán.
Pillado, que foi secretaria xeral da Universidade de Vigo durante o mandato de Alberto Gago entre 2006-2010, é docente do Departamento de Dereito Público, do que é directora e, desde comezos deste ano, é tamén vogal permanente da Comisión Xeral de Codificación, adscrita á Sección de Dereito Procesual.
Para ela, o desenvolvemento do cargo de valedora universitaria “supón un reto persoal e profesional importante” que lle permitirá aplicar na universidade “toda a súa experiencia na xestión e resolución de conflitos de forma pacífica”, recolle a universidade nun comunicado.
MATRÍCULAS
Na mesma sesión ordinaria do claustro, o reitor, Manuel Reigosa, tamén presentou os datos provisionais de matrícula de estudantes de novo ingreso. Así, destacou que a pesar de que este se presentaba como un ano “complicado” polas “baixas cifras” de estudantes que accedían ao sistema universitario, a taxa de ocupación en primeiro, a falta de pechar o último prazo, é do 101,6%.
Segundo as súas cifras, en Ourense ofertáronse un total de 908 prazas, das cales se cubriron 891, o que supón un 98% das mesmas. Con todo, en Pontevedra accederon 814 a unha carreira universitaria, a pesar de que só se ofrecían 793 postos, é dicir, un 120,6%, mentres que en Vigo cubríronse 2.026 vacantes, das 1.970 ofrecidas (102,8%).
“É que a pesar de que quedan vacantes en varias titulacións, outras matricularon máis estudantes dos previstos, ao coincidir as notas de corte”, explicou Reigosa. Desta maneira, o reitor remarcou que se trata da “mellor cifra de matrícula” en primeiro dos últimos sete anos.
