Un total de 14.508 persoas da área sanitaria de Vigo xa solicitaron a súa cita para acudir a vacinarse da gripe nos próximos días, segundo datos da Consellería de Sanidade, que iniciou este luns a campaña de vacinación antigripal. Así, nun comunicado, a Xunta destacou que os cidadáns teñen ata o 27 de decembro para vacinarse, polo que “hai tempo suficiente para facelo progresivamente”.
“É moi importante a concienciación dos equipos de Atención Primaria na promoción da vacina, así como as recomendacións de medidas de profilaxis para evitar os contagios. Ademais, este ano contamos cunha vacina tetravalente cun maior efecto inmunológico”, explicou a directora de procesos sen Ingresos e Urxencias da EOXI de Vigo, Elena Lorenzo. Neste sentido, lembrou que o ano pasado na área viguesa rexistráronse 371 ingresos hospitalarios e 26 decesos como consecuencia dun proceso gripal.
Tal como destacou o Goberno galego, algunhas das medidas que se van levar a cabo para promover a vacinación serán, entre a terceira e cuarta semana de campaña, o desenvolvemento do programa de promoción da vacinación antigripal mediante SMS aos maiores de 65 anos e a chamada activa.
CHAMADAS TELEFÓNICAS
“A área sanitaria de Vigo é a que realiza un maior número de chamadas telefónicas e a que rexistra unha maior efectividade das mesmas. O pasado ano efectuáronse 9.868 chamadas e grazas a ese esforzo conseguiuse que un 14,93% máis da poboación de risco recibise a dose da vacina”, indicou Lorenzo.
A campaña de vacinación contra a gripe, que a consellería de Sanidade puxo en marcha este luns contempla 250 puntos de vacinación na provincia de Pontevedra, entre centros de saúde, consultorios, hospitais, residencias, unidades asistenciais, etc.
Este ano adquiríronse 615.000 dose desta vacina (7.000 máis que na campaña do ano pasado), cun orzamento de case 3,5 millóns de euros (un 59 % máis) e Galicia será a primeira autonomía en administrar nesta campaña unha vacina tetracelular a persoas de 15 a 64 anos de idade con factores de risco.
