O Concello de Vigo contratará un servizo de inspección aérea, vía satélite, para supervisar a limpeza das chamadas franxas secundarias, un espazo de 50 metros ao redor das edificacións en zonas forestais, e que deben permanecer limpas no marco do plan de prevención e defensa contra incendios.

O alcalde, Abel Caballero, explicou que ese plan de prevención foi aprobado inicialmente este xoves en Xunta de Goberno, e que será trasladado á Consellería de Medio Rural, antes da aprobación inicial e entrada en vigor.

O plan establece a obrigación dos propietarios de manter limpa esa franxa de 50 metros, así como o establecemento doutro espazo de 400 metros, chamada ‘zona de influencia’, na que tamén deben aplicarse outras medidas, aínda que menos esixentes.

Para comprobar o cumprimento desta obrigación, o Concello contratará un servizo de inspección aérea vía satélite. No caso de que os propietarios non limpen as franxas, farao de forma subsidiaria o consistorio, que repercutirá posteriormente o gasto aos particulares.

Caballero explicou que o plan afecta, en Vigo, a 34.083 leiras, que suman case 2.000 hectáreas, e das que a gran maioría (31.156 leiras) son rústicas, mentres que 2.927 son urbanas.

ANEL VERDE

Por outra banda, o rexedor explicou que, paralelamente a este plan, ao que obriga a Xunta de Galicia, o Concello segue tramitando o seu proxecto de ‘anel verde’, un espazo vexetal de 50 quilómetros ao redor da cidade, separando a zona urbana dos montes vigueses.

Este ‘anel’ terá 100 metros de ancho, con biomasa resistente ao lume, e un trazado ao longo do perímetro para permitir a circulación a vehículos de emerxencia e de extinción de incendios.

O proxecto, que ten un horizonte de desenvolvemento “de 20 anos”, financiarase con fondos municipais. “Aprendemos moito daqueles incendios de outubro de 2017, e facemos todo o posible para que non se volvan a repetir”, proclamou o alcalde de Vigo.