Un grupo de veciños e pais e nais de alumnos do CEIP Alexandre Bóveda, en Chapela (Redondela), volveron a mobilizarse este mércores, coincidindo co inicio do curso escolar, cunha ‘concentración de mochilas’ para reclamar a instalación dun semáforo ou outra alternativa, que permita aos peóns cruzar con seguridade a N-552.

Varias decenas de persoas reuníronse nese viario, á altura da rúa que dá acceso ao centro educativo, con pancartas nas que podían lerse lemas como “Queremos chegar ao cole sen sustos” ou “Paso seguro xa!”.

Os veciños levan anos denunciando o alto perigo dese tramo de estrada, onde se produciron numerosos atropelos e accidentes de tráfico graves, porque os condutores non respectan a limitación de velocidade establecida (50km/h) e porque, nunha distancia duns dous quilómetros, non existe nin un paso de peóns, nin un paso elevado ou un semáforo que garanta a seguridade dos peóns.

Así, algúns pais dos alumnos lamentaron que, a pesar de vivir a escasos metros do colexio, non poden levar aos seus fillos camiñando ao centro, polo mero feito de que as súas casas están alén da estrada “e non hai por onde cruzar”.