O grupo municipal Marea de Vigo-Son en Común levará ao pleno do próximo 4 de setembro unha moción instando o goberno municipal a que se some á declaración pola “emerxencia climática” no planeta.

Segundo trasladou a concelleira Oriana Méndez, esta proposta –avalada por diversos colectivos ambientais e ecoloxistas– pretende que o Concello, desde o ámbito local, adopte medidas e destine recursos para responder á “crise ecolóxica” que supón o cambio climático.

Así, declarar a emerxencia climática supón asumir “compromisos políticos reais e vinculantes, moito máis ambiciosos que os actuais”, e a correspondente “asignación de recursos”. Nesa liña, as institucións deben elaborar unha folla de ruta con medidas para limitar o aumento das temperaturas globais.

Entre esas medidas, indicou Marea de Vigo, está a aposta polas enerxías 100 % renovables, o abandono dos combustibles fósiles, ou o impulso á mobilidade sustentable. Tamén expoñen o apoio á economía local e de proximidade, que impulse a soberanía alimentaria, a agricultura, silvicultura e gandarías ecolóxicas.