A ría de Vigo acollerá o 20 de xullo o evento ‘Vigo a Vela‘, a primeira edición da Regata Solidaria pola Inclusión Social de persoas con discapacidade, na que participarán membros de varias entidades sociais e na que se recadarán fondos en beneficio de tres ONG de carácter solidario.

A regata foi presentada este martes por Diego Maraña, responsable da consultora Mundinova, promotora do evento, en colaboración co Real Club Náutico de Vigo, Sailway, Fundación Once e outras empresas e entidades.

Segundo explicou Maraña, a regata constará dunha travesía de 15 millas bordeando a costa, na que participarán 10 embarcacións, cuxas tripulacións serán mixtas. Así, ademais dos regatistas habituais, en cada barco navegarán cinco persoas con discapacidade intelectual ou física de diversas entidades (Fundación Once, Down Vigo, Discamino, Fogar San Rafael, Aspanaex, ou o equipo de fútbol Celta Integra).

Ademais, os deportistas Desirée Vilas e Chano Rodríguez serán os padriños desta primeira regata e formarán parte tamén das tripulacións. Por outra banda, e ademais da experiencia deportiva, recadaranse fondos con fins solidarios a través da plataforma migranodearena.org, e o diñeiro que se reúna destinarase á ONG Discamino (para a adquisición dunha nova bicicleta adaptada), Fundación Amedis (para un programa de uso de novas tecnoloxías) e a Unoentrecienmil (para axudar a financiar unha bolsa de investigación sobre leucemia infantil).