A Garda Civil investiga penalmente a un veciño da Cañiza de 46 anos como presunto autor dun delito de incendio forestal no mesmo municipio. O individuo alegou que tentara gastar unha broma prendendo lume a unhas herbas no camiño.

Segundo informou o Instituto Armado, o incendio produciuse sobre as 16,00 horas do pasado domingo día 2 nun monte situado no lugar das Pedreiras, na parroquia de Valeixe.

Como consecuencia das chamas resultaron afectadas algo máis de tres hectáreas de monte baixo. Nos traballos de extinción tiveron que intervir varios reténs contra incendios da zona co apoio de tres motobombas e o helicóptero, indicaron as mesmas fontes.

“Coa rápida intervención dos servizos de extinción púidose conseguir que, apenas dúas horas despois, o lume xa estivese perfectamente estabilizado, evitando que se producisen danos de consideración”, destacou a Benemérita.

Froito do posterior labor de investigación desenvolvida polos efectivos do Posto da Garda Civil da Cañiza para coñecer as circunstancias e a orixe do incendio, púidose coñecer foran vistas dúas persoas polas inmediacións da zona moi pouco despois do inicio do incendio.

BROMA

Do testemuño destas persoas púidose deducir que unha delas “pretendera gastar unha broma prendendo lume cun chisqueiro ás herbas que se atopaban no camiño e despois non puido evitar que o lume se propagase polo resto do monte”, relatan as mesmas fontes.

Esta persoa, que resultou ser un veciño do mesmo municipio, foi notificada en calidade de investigada como presunto autor dun delito de incendio forestal. As dilixencias foron entregadas no Xulgado de Instrución número 3 de Ponteareas, onde deberá comparecer cando sexa requirido.