Médicos de Atención Primaria da área sanitaria de Vigo demandarán, mediante a folga que se celebrará os días 21 e 22 de maio, persoal específico para as ambulancias do 061 para evitar que os facultativos que traballan nos centros se vexan obrigados a abandonalos durante a súa xornada laboral.
Segundo se recolle no documento no que se presenta a convocatoria dos paros, acordados este luns nunha asemblea composta por máis de 160 profesionais, tamén se reivindicarán o acceso á tecnoloxía diagnóstica “nas mesmas condicións” que os traballadores que exercen a súa función nos hospitais.
Ademais, esixirase ao Sergas o “cumprimento” do plan de necesidades e do instrumental remitidos en 2018 á xerencia da Estrutura Organizativa de Xestión Integrada (EOXI), cuxa dimisión tamén se contemplou entre as principais demandas.
En canto á atención aos pacientes, os médicos aspiran a contar cun número limitado de consultas e a que cada unha delas se desnvolva, como mínimo, durante dez minutos.
Adicionalmente, os facultativos da área sanitaria de Vigo reclamarán “a eliminación das e-consultas” e o mantemento da derivación presencial “para todas as especialidades”, así como a supresión das caixas de correos virtuais.
Entre as súas reivindicacións tamén se incluirán unha demora máxima de 45 días para as consultas externas en Atención Hospitalaria e o acceso ás probas diagnósticas, ademais de que as consultas preferentes sexan decididas polo médico de Atención Primaria cunha espera máxima de 15 días.