O Concello de Tui informou este venres de que xa finalizaron as obras de democilición da totalidade das edificacións que compuñan a pirotecnia ‘La Gallega’, do mesmo dono –en prisión provisional– que o almacén ilegal de material explosivo que estoupou no barrio de Paramos o pasado maio, acabando coa vida de dúas persoas e causando numerosas desfeitas materiais.

O Consistorio trasladou que xa notificou ao Xulgado do Contencioso Administrativo número 1 de Pontevedra que a demolición das instalacións da parroquia de Baldráns, en Tui, terminou, cumprindo así “escrupulosamente” o ordenado nun auto xudicial.

Trátase do auto do pasado 16 de novembro no que este xulgado sinalou “expresamente” a obrigación de demoler “todas as construcións obxecto do proxecto de legalización autorizado pola licenza de obras maiores anulada”.

Este proxecto de demolición, segundo indicou o Concello, como indicaba o informe dos servizos técnicos municipais, amparaba a totalidade das edificacións das instalacións da pirotecnia da parroquia de Baldráns, en Tui.