O alcalde de Vigo, Abel Caballero, confirmou o traslado do mercadiño de Nadal “Cíes Market” e da nora e o resto das atraccións á contorna do centro comercial Vialia. Nun audio enviado aos medios de comunicación, o rexedor informou de que nestas festas o mercadiño non se instalará na Alameda, senón na praza exterior de Vialia, como se viña especulando nas últimas semanas.
Caballero enmarcou o traslado no obxectivo do Concello de levar o Nadal a máis lugares da cidade. Segundo lembrou, o ano pasado xa houbo un pequeno mercadiño na zona que “foi ben” e que agora dará paso ao gran mercado de Nadal da cidade. Pola súa banda, a nora situarase no aparcadoiro exterior do centro comercial, xunto con outras atraccións, apuntou.
PROTESTAS VECIÑAIS POLO RUÍDO
O cambio de localización chega despois de que veciños do centro de Vigo presentasen múltiples protestas polo ruído que xeraban as atraccións e o mercado na Alameda durante dous meses. As queixas veciñais chegaron tamén aos tribunais, coa presentación de denuncias.
