Arredor de 200 persoas recibiron este mércores en Vigo o buque “Kate Tenacity” da Flotilla da Liberdade, que navega rumbo a Gaza, despois de que hai dúas semanas a nave cancelase a súa viaxe á cidade olívica e se detivese en Santander por unha avaría.
Na súa ruta, que partiu de Bristol (Reino Unido), o barco prevé facer varias paradas por España, Portugal e Italia antes de iniciar o traxecto a Gaza. Así, recalou en Bilbao e Castro Urdiales, ademais de Santander, antes de chegar a Vigo. Aquí, decenas de persoas convocadas por distintos colectivos sociais, como a Plataforma Cívica Vigo Pro Palestina, entre outros, agrupáronse no porto vigués para darlles a benvida e agradecerlles o seu labor en defensa dunha Palestina libre.
“Sabemos que tentarán silenciarvos”, reivindicaron as persoas asistentes, ao ler un manifesto no que insistiron en que as verdadeiras vítimas “están no seu destino, en Gaza”, polo que a súa misión “non é un acto de provocación”, senón de “humanidade”. Ao berro de “Onde están, que non se ven, as sancións a Israel?” e co son das gaitas, as persoas presentes agradeceron o esforzo das embarcadas, que percorrerán milleiros de quilómetros para axudar a combater o “xenocidio” en Gaza.
A organización lamentou que gran parte do mundo vexa con “indiferenza” o que está a ocorrer na Faixa, aínda que subliñaron que a Flotilla “non está soa”, senón que cada paso que dá “soa en milleiros de corazóns”. Por iso, reivindicaron a súa “valentía”, xa que é “un impulso” para seguir esixindo a liberdade de Palestina. O acto contou coa presenza, entre outros, de varios representantes do BNG de Vigo, incluído o seu portavoz, Xabier Pérez Igrexas.
