O alcalde de Vigo, Abel Caballero, asegurou que os hoteis da cidade acadaron esta fin de semana o 100% de ocupación, coincidindo coa celebración de O Marisquiño, que se desenvolveu en Samil desde o xoves ata o domingo. Nun audio remitido aos medios de comunicación, o rexedor afirmou que tanto o venres como o sábado se rexistrou un “récord” de ocupación, con “todos os hoteis completos”. Caballero atribuíu estes datos ao tirón de O Marisquiño, sumado a outras propostas culturais celebradas na cidade, como o concerto de Abraham Mateo e a representación de “Nabucco” en Castrelos.

UN VERÁN “TURISTICAMENTE EXCEPCIONAL”

Para o alcalde, este verán está a ser “turisticamente excepcional” en Vigo, cunha intensa programación cultural e de lecer que, segundo defende, está a ter un impacto directo na ocupación hoteleira. Caballero lembrou ademais que o Concello de Vigo destinou 1,35 millóns de euros a O Marisquiño, un dos grandes eventos do calendario estival da cidade. O festival de cultura urbana volveu así a converterse nun dos principais reclamos da fin de semana en Vigo, cunha alta afluencia de visitantes e cun impacto que, segundo o rexedor, se deixou notar especialmente no sector hoteleiro.