Un home de 53 anos foi detido durante a madrugada deste martes en Vigo por supostamente agredir a súa parella durante unhas festas patronais celebradas no barrio de Teis. Segundo informou a Policía Local de Vigo, os feitos producíronse arredor das 02.30 horas na rúa Hermanos Misioneros Pobres. Os axentes que se atopaban na zona para garantir a seguridade durante as festas observaron varias persoas discutindo de maneira acalorada na vía pública.
Os policías achegáronse ao tumulto e as persoas presentes explicáronlles que se iniciara unha pelexa despois de que un home agredise unha muller. Ao falar coa suposta vítima, esta confirmou que fora atacada pola súa parella sentimental. Segundo o seu relato, o home tamén golpeou outras persoas que interviñeron para tratar de separalos.
A muller manifestou ademais que xa sufrira anteriormente outros episodios de violencia física por parte da súa parella. Ante esta situación, os axentes localizaron e detiveron o suposto agresor. A Policía Local instruíu as correspondentes dilixencias, que foron remitidas á autoridade xudicial competente.
