O Goberno de Vigo aprobou este venres a cesión ao Ministerio de Cultura da parcela na que se situará a futura Biblioteca do Estado. O movemento prodúcese un ano despois da visita do ministro, Ernest Urtasun, en xullo de 2025, cando se anunciou esta cesión.
Nun audio enviado aos medios de comunicación, o alcalde, Abel Caballero, informou de que finalmente se aprobou a cesión desta parcela, situada na rúa Lalín e cunha superficie de case 6.000 metros cadrados. O rexedor subliñou que se trata dun “paso moi importante”, xa que permitirá ao Goberno central elaborar agora o proxecto da futura biblioteca.
O PP REIVINDICA QUE XA ADVERTIRA DA NECESIDADE DA CESIÓN
O PP de Vigo non tardou en reaccionar ao anuncio do Goberno local. A presidenta dos populares vigueses, Luisa Sánchez, reivindicou que foi o seu grupo quen advertiu hai tempo de que o Concello debía ceder formalmente a parcela para que se puidese avanzar no proxecto.
“Fomos nós os que lle avisamos hai tempo de que tiña que ceder a parcela para que se puidese facer o proxecto, mentres el se empeñaba en dicir que abondaba con poñer os terreos á disposición. Non era así”, afirmou Sánchez en referencia ao alcalde. A aprobación da cesión abre agora unha nova fase para o futuro equipamento cultural, pendente da redacción do proxecto por parte do Ministerio de Cultura.
