A Xunta de Goberno Local de Vigo aprobou este venres solicitar á Dirección Xeral de Estratexias de Mobilidade do Ministerio de Transportes unha subvención para financiar o servizo de autobús urbano, segundo confirmou o alcalde, Abel Caballero, en declaracións remitidas aos medios. O rexedor explicou que o Concello xa contou con esta axuda o ano pasado, por un importe de algo máis de 1,1 millóns de euros, e que o goberno municipal agarda conseguir unha contía semellante neste 2026.

Caballero lembrou que o Goberno de España achega esta liña de apoio ao transporte público e que, ademais, “paga todas as viaxes dos menores de 15 anos”. “Polo tanto, un apoio moi significativo ao transporte urbano de Vigo. E a Xunta, cero”, apuntou o alcalde. Nesa liña, o rexedor vigués contrapuxo o apoio do Executivo central coa falta de achegas por parte do Goberno galego. “O Goberno de España dános cantidades ingentes para apoiar o transporte público en Vigo e a Xunta non, a Xunta cero”, remarcou.

Caballero asegurou que o Concello está “moi satisfeito” co Goberno de España porque, segundo dixo, “apoia Vigo”, mentres que a Xunta “non apoia” a cidade. A solicitude aprobada este venres busca así garantir unha nova achega estatal para contribuír ao financiamento do servizo municipal de autobús urbano, nun contexto no que o Concello volve poñer o foco na comparación entre as achegas do Estado e as da Administración autonómica.